與Erica相識26年的導演Cindy大談「初戀」回憶？ 少女心分享愛情貼士
這次Synergie Zinc 級物理防曬的TVC 找了Cindy Yu（余詩迪）來做導演，我與她由電影《初戀無限Touch》結緣，那時她是助理製片，我是小演員，嘩，計一計我倆已經相識了26年（笑）！這次有幸找她為MI MING MART 執導廣告非常開心，捉住佢傾下《初戀》偈先
～
拍《初戀無限Touch》時，有沒有什麼難忘回憶？
Erica：有場戲係香港公園，好熱，超辛苦！
Cindy：果日仲要拍結婚戲，你爸爸（許冠英飾）仲要抽住隻山雞呀，你記唔記得？
Erica：果時無而家咁方便，我地靠住一張紙，上面寫哂外景地方、時間、拍咩場口，我地睇住要紙做人，唔見咗真係死硬。仲有諗返當年《初戀無限Touch》個卡士好勁下，陳曉東、梁詠琪好紅，馬偉豪導演、舒琪做監製，鄒凱光編劇⋯⋯而家個個都變哂有名導演了！
Cindy：係呀，諗返都覺得好鬼勁，呀，有件事都想分享返，我當時係《初戀》入面除了是助製也是臨時演員，有日係街度拍緊嘢，點知被人投訴，有警察過來問我「夠秤未？負責人係邊個？」因為當時我地係學校門口著住校服拍（間學校投訴）
Erica：咁當時邊個過去認頭？
Cindy：我啦！著住校服過去話：「我係負責人，今年19歲，哈哈，又做幕前又做幕後，好鬼難忘！」
分身有術，考試拍戲比賽同步
Erica：我當年16歲，算唔算童工？
Cindy：唔算啦，都「夠秤」了。
Erica：諗起果時都好忙，拍戲果時其實考緊Mock Exam（中五會考前的模擬考試），有一晚拍完4點幾，緊接第2日學校有個田俓比賽，跑200米跑得好差比老師鬧到我呢⋯⋯😅😅😅，睇首映果晚，我又係話病偷走出來（小朋友唔好學）仲記得係我出場果時，有個觀眾話我似酒井法子，開心死我！
初戀就要結婚？！Cindy 導演的粉紅少女史
Cindy：我嘅初戀係⋯⋯嚷著要結婚，好想衝去結婚！
Erica：咁變態？果時幾歲？
Cindy：我初戀係17歲，記得踏正18歲果下我就去考車牌同埋問阿媽我可唔可以結婚（笑）
Erica：你阿媽一定話你痴線
Cindy：咁你又點？
Erica：我嘅初戀真係唔知點形容⋯⋯中學果時，像風又像花咁囉，係果種大家都知大家有意，但又無事發生，之後個男仔移民走咗，但點知我地係美國又遇返，讀同一間大學添⋯（我老公睇到呢段片死啦唉！)
Cindy：死啦，我老公睇到實話：「嘩，18歲就想結婚呀？」
最大膽的愛情Tips：「最緊要試！」
Cindy：愛情Tips 就是要「Keep 住拍拖！」
Erica：咩Tips 嚟？！你渣女嚟㗎？哈哈哈
Cindy：我真無點停止過拍拖⋯⋯
Erica：不過我都係
但我唔覺呢個係愛情貼士囉，我認為係要睇得「Easy」少少，唔好介意太多。
Cindy：都係，同埋少啲嗌交。嗌交美其名係「耍花窗」，但我覺得對段感情都會有傷害。
Erica：當你果刻啲火升上來的時候，calm 一 calm 先⋯⋯ 有啲交值得嗌，係一種溝通，但雞毛蒜皮就無謂啦。
Cindy：其實年紀大咗，對住適合嘅人都少啲呢類交嗌，成熟啲會識尊重人㗎嘛，但尊重人唔一定要年紀大先做，建議大家後生時都可諗多啲人感受，會早啲開花結果。
咁多年無合作，今次合作感覺如何？
Erica：無變過，好似同以前一樣。
Cindy：我肥咗，你就無變啦！我又唔係做幕前，捱得多都殘咗。講返合作上，又幾合拍，我地度橋一傾又OK，都好信任。
Erica：我地好夾嘅～
Cindy：頭先睇片我都問佢覺得點，佢話：「你OK我OK啦！」
Erica：咁梗係啦～
Cindy：唔係個個客都係咁，多謝你信任，我地最近見面食果餐飯係咁「想當年」
Erica：我仲以為十幾年前，原來廿幾年啦，唉呀⋯⋯哈哈哈
後記：
這次除了Cindy導演，Marketing team suggest 後找了啱Channel（英文：Arm Channel TV）的演員jackie （劉展翹）來做TVC其中一個角色，覺得她性格爽朗，一頭短髮，著起運動服也有女性體態美，和另一位面尖尖頭髮長長的Jane不同感覺，希望這次選角都能為大家帶來新鮮感呢！
