作為投資初哥的小編最近問起我買咩股票好，銀行股係咪最穩鎮咁話？隨著疫情迅速蔓延，引發嚴重的經濟擔憂，股市變得非常動盪。在2020年3月份10天內觸發了4次熔斷機制*（Circuit breaker），分別是3月9日、3月12日、3月16日及3月18日，道瓊斯指數的跌幅分別達到7.8%、10.0%、12.9%，一次比一次跌得狠，而3月18日美股因標普500指數盤中跌超7%，再次觸發熔斷機制，暫停交易15分鐘，為美股史上第五次熔斷。(第一次觸發熔斷機制是在1997年10月27日)
當時我諗好多人，甚至是我自己亦會想博一博會唔會有反彈嘅可能性，但其實是一件好危險嘅事，因為低位是不能預計的
*熔斷機制：（英語：Circuit breaker / Trading curb），指的是在股票市場的交易時間中，當價格波動的幅度達到某一個限定的目標（熔斷點）時，對其暫停交易一段時間的機制。（ 此機制如同保險絲在電流過大時候熔斷比較相似，故而得名。）
現行的熔斷機制在2013年4月修訂，分3階段煞停股市：
- 第1階段：與前一交易日的收市價相比，如標普500指數下跌7%，會暫停交易15分鐘。
- 第2階段：與前一交易日的收市價相比，如標普500指數下跌13%，再暫停多15分鐘。
- 第3階段：與前一交易日的收市價相比，如標普500指數下跌20%，馬上休市，於下一交易日恢復交易。但如果在美國東岸時間下午3時25分或之後出現上述跌幅，熔斷機制不會觸發。
資料來源：https://www.cnbc.com/2015/08/24/heres-a-brief-review-of-the-stock-circuit-breakers.html
Cash is King
很多人投資時，覺得自己手持現金已經蝕咗，（也因為息底沒有拎去定期）但無諗過全球資產下跌時，包括樓市、股市等，你手持現金其實已經係賺咗。舉個非常簡單的例子：本來你以1000元才能購入1手股票，因股市大跌，你可以用1000元購入1.5手股票。Cash is King 就是這個意思，你的cash比以前值錢，而且你有流動性，日後可以自由選擇投資什麼。
手持港幣最幸福？
作為香港人持有港幣是一件幸運的事，原因是香港由1983年10月17日開始實施的匯率制度，以百分百外匯儲備保證，港元以7.75至7.85港元兌1美元的匯率與美元掛勾，由於美元可稱為一個霸權，許多股票、商品、債務交易都以美金，無論個市點跌，甚至無限QE都好，美金還是有無限量需求，價格都能保持穩定。（但當然聯繫匯率也有不少弊病，香港人買不到樓絕大理由就是因為聯匯，這個日後可以再談。）
勿襯股市下跌，立刻接火棒
不論新手老手，常會犯的一個錯誤：股市一跌，立刻心急入市。專業的投資者會等到個市跌到落底嘅一刻回升小小先入市。
小編立刻問我：「咁點知已經跌到落低？我都以為匯豐跌到落44蚊已經好低⋯⋯」
所以買股票唔係人叫你買你就買，要睇新聞，留意市場情況。現時市道咁鬼差，銀行股真係好穩鎮咩？大公司細公司相繼倒閉，航空業近癱瘓，裁員幅度大、名牌酒店都要停業、油價由$60一桶跌到落$20，幾多油公司會倒閉？要知道好多公司其實都係借咗銀行錢去行盤生意，若然公司倒閉後，欠款未能歸還予銀行⋯⋯銀行係要撇債，匯豐不派息已經可以預見銀行股未來6個月情況都係好嚴峻，相信會有更多銀行股不派息。銀行是百業之母，個個國家都要救銀行，他不倒閉不擠提並不代表是一項好投資。
「若然已經預見到隻股未來2個月甚至6個月完全不會為你帶來任進帳，咁買嚟又做乜？」
小編又問：「咁油嘅股又可以入手？見到最近都好似有回升嘅跡象！」
石油屬於另一個Topic，屬於原物料商品類，最近石油的升跌 based on 政治原因多於一切，沙地阿拉伯同埋俄羅斯嗌交拉低油價，但低到去$19確實好唔尋常。又撞啱疫情關係，航空業大量減班，石油的需求急跌。一樣，都睇唔到石油會有V型反彈嘅可能性。不過油價$20以下分段吸納石油ETF，長線而言風險好細，但都要等一年半載各行各業消化了現時的石油囤貨先有機會去番正常的$35-$40。
小編心急到死咁話：「呢樣又唔得，果樣都唔得，咁逆市可以買乜啫？」
冷靜小小先，用普通人眼光望下形勢先，唔好覺得自己唔買就一定係蝕。諗清楚先出手，呢段時間我反而會放心機落去所以外匯度⋯⋯（小編：下，咁咪要放好耐？）又唔一定，俾張圖你望下澳紙個走勢你就明。
澳紙呢幾年最高位都去到兌6.3港幣，跌到落5嘅時候都已經有兩個幾月，最近一次再跌到落4.3，currency 價值點都係有一定基準，因為始終都會有人用㗎嘛～最近我會玩吓外匯，所謂cash is king，外幣也是cash。不過都係短炒波幅，長線會強的貨幣，我哋已經揸緊啦！假如全球recession，亦不妨吸納另一個避險貨幣：日圓。
黃金夠穩鎮啦！呢鋪仲唔係買金？
想當年2008，09年我都係炒金起家嘅，市道一差，好多人都會避險買金。但3月美股跌停市果晚，啲金竟然不升反跌，因為個個都蝕到無哂錢，走去賣哂啲金！想像一下，好多人都係借錢買股票嘅，當佢買價值10元股，借了9蚊去買，點跌到落6蚊，借俾你果個梗係催你還錢啦！咁你如果本身有黃金，當然拿拿聲兌返嚟還錢啦所以三月頭股市急跌黃金也跟著跌就是這個原因。避險情緒雖然最近有所緩和，但股市和債務現在充滿地雷，所以我個人還是看好黃金，每次下跌可以分段吸納優質黃金股，目標升破歷史高位。
總結：外幣之間比較容易轉換，保守啲，袋多啲cash flow先，投資嘅資金亦一定唔可以動用到自己嘅緊急資金（突然無了份工，可以維持5-6個月嘅生活費），長線唔想博又想收下息嘅都可以買下中電，港燈啦（呢類型點都唔會執）股價波動不大，派息亦唔錯啦。
